Forca të shumta policie janë vendosur në Vlorë, me qëllim gjetjen dhe kapjen e personave të përmendur në dosjen “Habilaj”.
Pas publikimit të përgjimeve dhe kapjes së 4.5 tonëve drogë në Vlorë, po kryhet një operacion nga prokurorë të Krimeve të Rënda dhe Delta Force, me mbështetjen e disa efektivëve të Drejtorisë së Policisë së Vlorës.
Kështu, kanë nisur kërkimet edhe për personat përgjegjës për sasinë e madhe të drogës që u kap në orët e para të së enjtes.
Mësohet se Delta Force kishte vendosur 3 pika kontrolli vetëm në fshat: e para në hyrje të varrezave, nga ku kalonte rruga për në shtëpinë e Armando Koçerit; e dyta në një banesë 1 km larg në vijë ajrore nga vila ku u gjet droga dhe pika e tretë ka qenë në hyrje të vilës, ku nuk lejohej të afroheshe. Operacioni dhe kërkimet në zonë kanë zgjatur për rreth 5 orë, ndërsa sot po ushtrohen kontrolle në banesat e gjithë personave të përmendur dhe të dalë në përgjimin e autoriteteve italiane.
Gjatë natës një person është shoqëruar me makinë të policisë nga vila ku u gjet droga, por policia e Vlorës është thuajse hermetike për informacione dhe emra të personave të shoqëruar, pasi nga ana e Prokurorisë së Krimeve të Rënda nuk ka pasur informacione për policinë e Vlorës, raporton Balkanweb. Pika të shumta kontrolli kryesisht nga Delta Force janë vendosur në të gjithë qytetin e Vlorës, ku po ushtrohen kontrolle të shumta tek personat dhe mjetet e dyshuara.
