Vllaznia është rikthyer tek fitorja pas dy humbjesh radhazi, duke mposhtur në “Loro Boriçi” Kamzën me rezultatin 3-2. Një ndeshje që nisi në ritme të larta nga vendasit dhe gjetën golin që në të 17’-ën me Andi Ribaj. Pjesa e parë u karakterizua me raste të shumta nga të dyja ekipet, por që nuk arritën ti finalizojnë në portë.
Pjesa e dytë flet sërish për Vllazninë e cila gjen golin e dytë me Cinarin, i cili përfiton mjaft mirë nga një kros i hedhur në zonë nga Kalaja dhe dërgon topin në rrjetë. Por nuk ka qetësi për shkodranët, sepse në 3 minuta, Erdenis Gurishta rrezikon të hedhë në erë atë që ishte ndërtuar deri në ato momente. Qendërmbrojtësi gabon fillimisht në mbulimin e Plakut, duke i dhënë mundësi këtij të fundit të shënojë dhe të hapë takimin.
Më pas, ishte sërish Gurishta që prek me dorë në mënyrë naive një krosim pa pretendime të Fukuit dhe gjyqtari Klajdi Kola akordon penallti. Kapiteni i Kamzës, Sebino Plaku ka sërish mundësinë për të shënuar dhe barazuar rezultatin, por nga 11 metrat gabon dhe godet jashtë. Kaq mjafton për shkodranët që të marrin zemër dhe të organizojnë një sulm mjaft të bukur në minutën e 56’, që u konkretizua me golin e Arlind Kalasë. Në minutën e 79’, Olsi Gocaj gaboi në largimin e një topi, duke ia dhuruar atë kundërshtarit, Ymeri, që goditi menjëherë dhe shënoi duke rihapur sfidën. Gjithsesi, deri në vërshëllimën e 3-fishtë të arbitrit Kola, nuk asgjë për t’u shënuar dhe sfida mbyllet me 3 pikët për shkodranët.
Vllaznia-Kamza 3-2
Golat: Ribaj 18’, Cinari 47’, Kalaja 56’ / Plaku 48’, Imeri 78′
Vllaznia: Sherri, Gocaj, Orelesi, Gurishta, Ruçi, Bardulla (Kalaja 46’), Tafili, Vucaj, Lika (Gurishta 89′), Çinari (Hajdari 88′), Ribaj. Trajner: Ernest Gjoka
Kamza: Gjonikaj, Frashëri, Fushtar, Kuqi (Lelis 65′), Neziri (Imeri 60′), Fukui, Arrabal, Ymeraj (Mumajesi 46’), Rezi, Mehmeti, Plaku. Trajner: Ramadan Ndreu
Gjyqtarë: Klajdi Kola, Denis Rexha, Nertil Bregasi
Kartonë të verdhë: Lika 24′ / Arrabal 15′, Fushtar 32’, Rezi 73’
