Pas heqjes së taksës nga kryeministri në detyrë i Kosovës Albin Kurti, vendim ky që ishte paralajmëruar të ndodhë me 1 prill, ka ardhur një reagim nga Serbia.
“Kurti nuk e ka hequr taksën. Mos bini pre e lajmeve të rreme. Kryeministri i Institucioneve të Përkohshme të vetëqeverisjes në Prishtinë ka njoftuar se të jem i saktë ‘vetëm pezullimi i taksës dhe pezullim i kushtëzuar’, ndërsa në të njëjtën kohë ka prezantuar masa tjera ndëshkuese për qytetarët tanë dhe ekonominë tonë që i ka quajtur masa të reciprocitetit”, është shprehur politikani serb Marko Đurić.
“Ky vendim i Kurtit është vetëm një shfaqje për bashkësinë ndërkombëtare. Prishtina po vazhdon të luajë me këtë çështje dhe perspektivën ekonomike të shoqërisë në Kosovë. Ky vendim është një shfaqje për një pjesë të bashkësisë ndërkombëtare”, vijon ai.
Đurić tha se këto masa që janë marrë ndaj Serbisë nuk janë të ngjashme me situatën që ishte para se të vendosej taksa.
Ai pohoi se masat e reja kanë të bëjnë me tregtinë dhe lirinë e mallrave e njerëzve: “Po vendosen barriera deri më sot të panjohura dhe që nuk kanë ekzistuar për tregtinë dhe lëvizjen e mallrave dhe të njerëzve. Është koha që këto dallime esenciale të lihen anash. Konsideroj se nuk është koha për vendosjen e masave sikurse kanë vepruar në Prishtinë, por është koha kur edhe dallimet e thella dhe thelbësore me Prishtinën duhet të mënjanohen. Dhe është koha kur të gjithë duhet të punojmë fuqishëm dhe të bashkëpunojmë për të tejkaluar këtë pandemi e cila nuk njeh kufij, apo përkatësi politike dhe kombësie”.
Kujtojmë se Qeveria në detyrë e Kosovës, ka votuar për heqjen e taksës 100% për produktetet e Serbisë dhe Bosnje Hercegovinës, duke i zëvendësuar ato me reciprocitet, shkruan “gazeta express”.
Por gjatë një konference të së martës, kryeministri në detyrë, Albin Kurti njoftoi se masat e reciprocitetit nuk do zbatoheshin me Bosnje Hercegovinën.
