Kombëtarja shqiptare e nisi mjaft mirë kompeticionin më të ri të futbollit National League. Kuqezinjtë mposhtën Izraelin në shtëpi dhe shpresat për të dalë e para në grup ishin të mëdha duke parë se janë vetëm 3 skuadra. Por ,ë pas dy transferta, dy humbje dhe çdo shpresë venitet duke bërë që të ketë vetëm një zgjidhje.
Në rast se Shqipëria do të ishte fituese e Grupit 1 të Ligës C, do të kalonte menjëherë në fazën play-off të marsit për kualifikimin në Euro 2020. Por gjithçka do të vendoset në tre ditë, ku kuqezinjtë do të presin Skocinë në “Loro Boriçi” dhe më pas këta të fundit përballen me Izraelin.
Ekziston vetëm një variant ku Shqipëria mund të kualifikohet si e para e grupit. Duhet që kuqezinjtë të fitojnë ndeshjen në Shkodër ndaj Skocisë me një diferencë prej 4 a më shumë golash.
Vetëm në këtë mënyrë golavarazhi i kuqezinjve do të shkonte +1. Ndërkohë, do të duhej që tre ditë më vonë, Skocia të tregonte egon e saj dhe të mundë Izraelin me 2 gola diferencë.
Në këtë mënyrë, të tre skuadrat do të ishin me pikë të barabarta dhe në lojë do të hynte golavarazhi i përgjithshëm i grupit, me vetëm Shqipërinë që do ta kishte pozitiv, ndërsa i Izraelit do të ishte 0 dhe i Skocisë -1. Futbolli është shpeshherë i çuditshëm, por ndoshta jo kaq shumë sa na duhet ne.
