Kina nisi stërvitje të paprecedentë ushtarake në gjashtë zona që rrethojnë Tajvanin të enjten, një ditë pas një vizite të kryetares së Dhomës së Përfaqësuesve të SHBA, Nancy Pelosi, në ishullin e vetëqeverisur që Pekini e konsideron si territor kinez.
Transmetuesi shtetëror i Kinës CCTV tha se stërvitjet kishin filluar dhe do të përfundonin në 04:00 GMT të dielën. Ato do të përfshijnë gjuajtje të drejtpërdrejtë në ujëra dhe në hapësirën ajrore përreth Tajvanit.
Zyrtarët e Tajvanit kanë thënë se stërvitjet shkelin rregullat e Kombeve të Bashkuara, pushtojnë hapësirën territoriale të Tajvanit dhe janë një sfidë e drejtpërdrejtë për lundrimin e lirë ajror dhe detar.
Kina po kryen stërvitje në rrugët më të ngarkuara ndërkombëtare ujore dhe rrugët e aviacionit, dhe kjo është “sjellje e papërgjegjshme, e paligjshme”, tha Partia Demokratike Progresive (DPP) në pushtet e Tajvanit.
Zëdhënësi i kabinetit të Tajvanit, duke shprehur dënimin serioz të stërvitjeve, tha gjithashtu se faqet e internetit të Ministrisë së Mbrojtjes, Ministrisë së Jashtme dhe zyrës presidenciale u sulmuan nga hakerat.
Të mërkurën mbrëma, vetëm disa orë pasi Pelosi u nis për në Korenë e Jugut, aeroplanë të paidentifikuar, ndoshta dronë, fluturuan mbi zonën e ishujve periferikë Kinmen të Tajvanit pranë bregut kontinental, tha Ministria e Mbrojtjes e Tajvanit.
Gjeneral-majori Chang Zone-sung i Komandës së Mbrojtjes Kinmen të ushtrisë, tha se dronët fluturuan në zonën Kinmen dy herë të mërkurën mbrëma, rreth orës 21:00 dhe 22:00.
“Menjëherë hodhëm fishekzjarrë për të paralajmëruar dhe për t’i larguar. Pas kësaj, ata u kthyen. Ata erdhën në zonën tonë të kufizuar dhe kjo është arsyeja pse ne i shpërndamë”, tha ai.
Kina, e cila pretendon Tajvanin si territorin e saj dhe rezervon të drejtën për ta marrë atë me forcë, tha të enjten se dallimet e saj me ishullin e vetëqeverisur ishin një çështje e brendshme.
“Ndëshkimi ynë për forcat e jashtme pro pavarësisë së Tajvanit është i arsyeshëm, i ligjshëm”, tha Zyra e Çështjeve të Tajvanit me qendër në Pekin në Kinë.
Në mënyrë të pazakontë, stërvitjet në gjashtë zona rreth Tajvanit u njoftuan me një hartë lokacioni të shpërndarë nga agjencia zyrtare e lajmeve Xinhua – një faktor që për disa analistë dhe studiues tregon nevojën për të luajtur si për audiencën vendase ashtu edhe për atë të huaj.
“Unë mendoj se kjo (vizita e Pelosit) është një gjë e mirë,” tha një burrë me mbiemrin Zhao në rrethin qendror të biznesit të kryeqytetit. “Kjo na jep një mundësi për të rrethuar Tajvanin, pastaj ta shfrytëzojmë këtë mundësi për të marrë Tajvanin me forcë. Mendoj se duhet të falenderojmë shokun Pelosi”.
Pelosi, vizitorja e nivelit më të lartë amerikan në Tajvan në 25 vjet, vlerësoi demokracinë e saj dhe premtoi solidaritetin amerikan gjatë ndalesës së saj të shkurtër, duke shtuar se zemërimi kinez nuk mund t’i ndalojë liderët botërorë të udhëtojnë atje. Kina thirri ambasadoren e SHBA-së në Pekin, në shenjë proteste kundër vizitës së saj dhe ndaloi disa importe bujqësore nga Tajvani.
Burimi i lajmit: Arab News. Përshtatur nga Tirana Today
