Figura e Skënderbeut iu përket shqiptarëve, por edhe ballkanasve të tjerë pasi ai i përkiste të tri feve kryesore, ndërsa sipas diskutimeve ndër historianë, mendohet se heroi ynë kombëtar Gjergj Kastrioti, fliste edhe gjuhët e tjera ballkanike.
Këto ishin disa nga ligjëratat e “Ora e Gjergjit”, e mbajtur në kuadër të 550-vjetorit të vdekjes së Skënderbeut dhe “Vitit Mbarëkombëtar të Skënderbeut”. Kjo ligjëratë u mbajt nën përkujdesjen e veçantë të kryeministri të Kosovës, Ramush Haradinaj.
Për Haradinajn, Gjergj Kastrioti-Skënderbeu është krijues i lirisë dhe inspirues për krijuesit.
“Me këtë manifestim po e nisim vitin jubilar. Skënderbeu u përket shqiptarëve, por edhe ballkanasve të tjerë, pasi që ai i përkiste tri feve dhe thonë se fliste gjuhët e Ballkanit. Ideali i tij ishte liria. Me orën e Gjergjit po nisemi në rrugëtimin epik të vitit të Skënderbeut. Skënderbeu ishte ndër të parët në Ballkan me vizion, ai ishte dje, vazhdon të jetë fija e artë që na lidh me aleatët tanë që na u gjenden në ditë të vështira, por na mbështetin edhe tani”-u shpreh Haradinaj.
Ndërsa, Reshat Sahitaj tha se është nder dhe privilegj për shkrimtarët që të hapin vitin e Skënderbeut. “Krijuesit janë luftëtarët e parë të lirisë përmes pendës së tyre”-u shpreh ai.
