Nesër kulmojnë festimet për ‘Vitin mbarëkombëtar Gjergj Kastrioti Skënderbeut’. Më 28 Nëntor shqiptarët përkujtojnë dy herë Pavarësinë e Shqipërisë; një herë më 1443 kur Skënderbeu ngriti flamurin e familjes së tij në Krujë, por dhe në 1912 kur Ismail Qemali ngriti flamurin në Vlorë.
Për ne shqiptarët “Gjergj Kastrioti Skënderbeu është heroi ynë kombëtar. Por fama dhe emri i tij është madhështor në të gjithë Evropën.
Statujat dhe bustet e tij i gjen në çdo shtet të Europës, madje dhe përtej oqeaneve. Në librat e historisë konsiderohet ‘gjeni’. Papa e quajti “Kalorës i Krishtit”. Polakët donin shumë të ishte heroi i tyre kombëtar. Grekët, serbët, malazezët dhe maqedonasit çfarë nuk shkruajnë që ai të paraqitet si i tyre. Pa dyshim ai është një nga figurat historike më të konsideruara në Europë.
Sonte qeveria shqiptare publikoi një artefakti të jashtëzakonshëm, hartë që provon vërtetësinë dhe influencën e figurës së Skënderbeut në Europën e shekullit XV.
Duke shkuar më tej, Tirana Today publikon për herë të parë një dokument unik i cili e zgjeron akoma më tepër lavdinë e heroit.
Tirana Today ka zbuluar se veç shkrimeve në poezi e prozë, veç dramave, operave etj, në Europën e viteve 1600 ka pasur një tjetër trend interesant. Ishte një kohë një pjesë e evropianëve pagëzonte fëmijët me emrin Gjergj Skënderbeu. Ndoshta duket e pabesueshme, por për këtë ka një dokument zyrtar. Dokumentin e ka publikuar “Internacional Archives”, e cila është një organizatë ndërkombëtare e bashkëpunimit të arkivave.
Në dokument (në rreshtin e dytë nga fundi) vërtetohet që një fëmije i është vënë emri Gjergj Skënderbeu. Pagëzimi është bërë më 7 shkurt 1619 dhe emri i plotë i fëmijës është George Scanderbag Bushell. Në letër nuk është sqaruar se në cilin shtet është bërë ky pagëzim.
Sigurisht, ky zbulim është mjaft i vogël para veprës së madhe të Skënderbeut, por kjo tregon se emri i tij ishte mit dhe legjendë për europianët e viteve 1600. Sigurisht, në Evropën e atyre viteve fëmijëve u viheshin emra heronjsh dhe jo emra aktorësh, futbollistësh etj. TIRANA TODAY
