Federata Botërore e Atletikës ka vendosur shtyrjen e Kampionatit Botëror, shkak për këtë ndryshim koronavirusi. Aktiviteti ishte planifikuar të zhvillohej në qytetin kinez Nanjing.
“Kampionati i planifikuar për 13-15 mars, është caktuar të zhvillohet në mars të vitit 2021”, njofton IAAF.
Qyteti kinez ende është në listën e dëshirës të Federatës Botërore, megjithatë, nuk përjashtohet mundësia që ky aktivitet të zhvendoset në një shtet tjetër nëse nuk arrin të kontrollohet virusi misterioz kinez.
“Këshilla e ekipit tonë mjekësor, të cilët janë në kontakt me Organizatën Botërore të Shëndetësisë (OBSH), është që përhapja e koronavirusit si brenda ashtu edhe jashtë Kinës është ende në një nivel shqetësues dhe askush nuk duhet të vazhdojë me ndonjë event të madh që mund të shtyhet”, shkruan në faqen e saj Federata Botërore e Atletikës.
