Situata në Kakavijë sa vjen dhe përkeqësohet, teksa vargu i makinave që presin të kalojnë kufirin raportohet se ka kaluar 20 kilometra.
Qytetarë të shumtë janë detyruar të kalojnë mbrëmjen e djeshme në makinat e tyre, pasi sporteli i palës greke është mbyllur në orën 22:00 për t’u hapur sërish në orën 6 të mëngjesit.
Ndërkohë, bëhet me dije se gjatë natës janë shtuar makinat me qytetarë shqiptarë që kërkojnë të kthehen në Greqi. Temperaturat e larta gjatë ditës dhe mungesa e shërbimeve në zonë e rëndojnë edhe më shumë gjendjen.
Radha e madhe është shkaktuar si pasojë e palës greke, e cila po zhvillon teste masive të koronavirusit për të gjithë udhëtarët që kalojnë kufirin.
