Të paktën 500 vetë, personel spitalesh në Vuhan janë infektuar me coronavirusin, siç konfirmohet nga burime të ndryshme në Kinë. Kjo ka shkaktuar mangësi të stafit mjekësor të spitaleve.
Qeveria kineze ka raportuar disa raste individuale të infektimit, por disa burime vendase kanë thënë se doktorëve e infermierëve u është thënë të mos bëjnë publike shifrat totale.
Siç duket, autoritetet po përpiqen të mbajnë lart moralin në përballjen me epideminë e rëndë.
OBSH-ja bëri me dije sot se kishte një mundësi reale për të ndaluar përhapjen në botë të coronavirusit të ri, që e quajti tashmë zyrtarisht “COVID-19”.
“Nëse ne investojmë tani, ne kemi një mundësi reale për të ndaluar këtë epidemi”, deklaroi drejtori i përgjithshëm i Organizatës Botërore të Shëndetësisë, Tedros Adhanom Ghebreyesus, në një konferencë shtypi në Gjenevë, ku ndodhet dhe selia e OBSH-së.
Ai njoftoi gjithashtu se coronavirusi i ri do të emërtohet tani COVID-19, pasi ishte quajtur përkohësisht “2019-nCoV”. “Emri i ri u zgjodh në mënyrë që të jetë më i lehtë për t’u shqiptuar”, nënvizoi ai.
Tedros Adhanom Ghebreyesus shpjegoi se “CO” nënkupton corona, “VI” virus dhe se “D” ishte zgjedhur për “sëmundjen”. Shifra 19 thekson vitin e shfaqjes (2019). Transkiptimi zyrtar i OBSH-së i vë të gjitha gërmat kapitale.
Referuar Shqipërisë, tashmë kemi gati vendin karantinë në rast rreziku nga coronavirusi. Gjatë raportimit në komisionin e Shëndetësisë dhe Çështjeve Sociale, ministrja Ogerta Manastirliu nuk bëri të ditur vendin se ku është ngritur spitali karantinë në rast se Shqipëria preket nga coronavirusi. Deri më tani, në Shqipëri nuk rezulton asnjë person i dyshuar me coronavirus.
Sipas OBSH, coronavirusi konsiderohet tashmë më i rrezikshëm se SARS-i, që në vitet 2002-2003 u mori jetën 774 personave.
