Të paktën 10 persona humbën jetën, ndërsa 15 të tjerë mbetën të plagosur pasi një furgon u fut në trotuar këtë të hënë, në Toronto të Kanadasë.
Ngjarja e rëndë ndodhi rreth orës 13:30 me orën lokale, në një kryqëzim tejet të populluar, në veri të qytetit.
Agresori është 25-vjeçari Alek Minassian, i është drejtuar një polici për ta sulmuar pasi doli nga furgoni i bardhë. Në pamje filmike dëgjohet polici që thrret: “Ulu në Tokë ose do të qëllohesh”, teksa i riu vazhdonte të qarkullonte.
Minassian u arrestua pak minuta pas sulmit të përgjakshëm, pas një përballjeje të tensionuar me policinë. Videot e publikuara në rrjet shfaqin të dyshuarin që shtiret sikur ka një armë, duke nxitur agjentin që të hapë zjarr. Por, ky i fundit u tregua mjaft gjakftohtë dhe mundi që të arrestojë të dyshuarin pa përdorur armë, diçka për të cilën ka marrë mjaft përgëzime.
Ndërkohë, hetuesit e Policisë së Torontos thonë se sulmi është qartësisht me dashje, por nuk janë ende të qarta motivet. Hetuesit janë treguar shumë të kursyer me detajet, ndërsa analistët thonë se fakti që i dyshuari nuk njihej nga autoritetet, e bën edhe më të ndërlikuar rastin.
Kryeministri kanadez Justin Trudeau tha se sulmi tragjik dhe i pakuptimtë i kishte shkaktuar trishtim të madh, ndërsa shtoi se qeveria është pranë viktimave dhe familjeve të tyre. TIRANA TODAY
