Një natë më parë mediat britanike bënë të ditur se nëntë emigrantë shqiptarë u shpëtuan në një grykë të vogël në mes të kanalit ujor që ndan Anglinë Jugore me Francën Veriore, teksa po përpiqeshin të kalonin mes erërave të forta.
Shqiptarët, tetë burra dhe një grua, u shpëtuan nga tre anije dhe një helikopter, të cilët u vunë në lëvizje për të gjetur anijen, pasi u raportua se disa njerëz ishin në telashe.
Lidhur më këtë ngjarje të rendë mësohet se dy presona janë vënë në pranga, për trafikimin e jashtëligjshëm të 9 shtetasve shqiptarë.
Dy prej burrave janë arrestuar nga Agjencia Kombëtare e Krimit dhe po merren në pyetje.
Martin Grace, zyrtar i lartë i hetimit, tha: “Ky incident tregon rreziqet që lidhen me përpjekjet për të kaluar kanalin në këtë mënyrë, ata ishin me fat që mundëm t’i shpëtonim. Një hetim është duke u zhvilluar dhe po punojmë ngushtë me Forcën Kufitare dhe Zbatimin e Emigracionit”.
Të tetë burrat dhe një grua u morën nga anija në 5 të mëngjesit të mërkurën. Ata u dërguan në breg, në portin “Eastbourne’s Sovereign”, të mërkurën pasdite dhe më pas u morën në pyetje nga Policia Kufitare.
Ata ishin nisur nga Franca të martën në mbrëmje. Një zëdhënës i Agjencisë Detare tha: “Ka të dëmtuar, por jo vdekje. Të gjithë janë në gjendje të mirë. Ata vetëm i ka zënë deti.”
Akoma nuk dihet si u dërgua sinjali për ndihmë nga anija me shqiptarë, sikurse nuk dihet se çfarë ndodhi që anije të kishte problem. Policia Kufitare përjashton problemet me motorin.
Raportohet se Agjencia Kombëtare e Krimit ka nisur hetimet për këtë ngjarje. Deputeti i Doverit, Çarli Elfik u bëri thirrje autoriteteve të jenë vigjilentë ndaj emigrantëve që përpiqen të hyjnë në Britani ilegalisht.
“Kjo ngjarje vërteton sërish se çfarë janë gati të bëjnë njerëzit për të ardhur në Angli. Janë gati të rrezikojnë edhe jetën e tyre. Nuk ka gjë më të rrezikshme se sa të kalosh mes këtij kanali në një varkë të vogël gjatë dimrit. Ne e dimë se më shumë emigrantë po kthehen nga Calais, pas komenteve të fundit nga Presidenti Macron. Kjo është arsyeja pse duhet të jemi më vigjilentë se kurrë dhe të mbrojmë kufijtë tanë.” – u shpreh deputeti Elfik.
Javën e kaluar u zbulua se qindra emigrant po jetojnë momentalisht afër portit të Calais në Francë, teksa përpiqen të gjejnë një mënyrë për të shkuar në Britani. TIRANA TODAY
