Dy persona janë arrestuar në flagrancë, pasi qarkullonin me armë zjarri në qytet. Bëhet fjalë për dy shtetas të moshës 25 dhe 49-vjeç, të cilët posedonin armë zjarri, e qarkullonin pa më të voglin problem në qytet. Në pranga kanë rënë shtetasit Ilir Birçaj, 49-vjeç dhe Baftjar Bushi, 25-vjeç.
“Në vijim të luftës kundër kriminalitetit për ruajtjen e rendit dhe të sigurisë së qytetarëve, Seksioni për Hetimin e Krimit pranë Komisariatit të Policisë Vlorë dhe Fier, kanë bërë të mundur kapjen në flagrancë të dy personave, të cilët qarkullonin me armë zjarri nëpër qytet.
Arrestohet nga Policia e Vlorës gjatë operacionit të koduar “FAST”, shtetasi Ilir Birçaj, 49-vjeç, banues në Vlorë, i cili qarkullonte me armë zjarri pistoletë në qytet. Nga hetimet e kryera, rezulton se ky shtetas është person me precedent penal për të njëjtën vepër penale (armëmbajtje pa leje) si dhe për kundërshtimin e punonjësit të policisë.
Ndërsa nga Policia e Fierit arrestohet shtetasi Baftjar Bushi, 25-vjeç, banues në Tiranë. Arrestimi i këtij shtetasi u bë pasi në lagjen “8 Shkurti” Fier, gjatë kontrollit të ushtruar në mjetin tip “Benz”, iu gjet dhe sekuestrua në cilësinë e provës materiale një armë zjarri pistoletë me fishekë, të cilën e mbante pa leje”.
Lidhur me këto dy raste, materialet iu referuan Prokurorisë Vlorë dhe Fier, për veprën penale “Prodhimi dhe mbajtja pa leje e armëve luftarake dhe e municionit”.
