Presidentja kroate, Kolinda Grabar-Kitaroviç, ishte e pranishme paraditen e së enjtes në Kuvendin e Shqipërisë, nga ku deklaroi se Shqipëria ka qenë mik i Kroacisë kur miqtë ishin të paktë. “Shumë shqiptarë sakrifikuan jetën e tyre për Kroacinë dhe ne nuk harrojmë”, tha Kitaroviç.
“Hapja e ambasadës kroate në Tiranë në vitin 1994 ishte një ngjarje e madhe për marrëdhëniet mes dy vendeve. Tani, Kroacia dhe Shqipëria marrin pjesë bashkë në operacionet në Afganistan. Kroacia e mbështet fuqishëm perspektivën europiane të Shqipërisë, rrugën drejt integrimit në BE dhe mirëpret progresin e bërë nga Shqipëria”, shtoi Presidentja e Kroacisë.
Më tej Presidentja Kolinda Grabar-Kitaroviç tha se “Kroacia e mbështet fuqishëm rrugën e Shqipërisë drejt integrimit në BE dhe mirëpret të gjithë progresin e dukshëm që është bërë nga Shqipëria për përmbushjen e kritereve drejt BE.”
Ajo tha se Kroacia i jep një rëndësi mjaft të madhe stabilitetit, sigurisë dhe begatisë në Europën Juglindore dhe e mbështet perspektivën eruopiane në të gjithë këtë rajon. “Shqipëria është një partner mjaft i rëndësishëm jo vetëm strategjik, por edhe politik dhe kjo gjë është pranuar dhe njohur edhe nga BE”.
“Sot si një kombi i ri, energjik dhe me njerëz të zellshëm dhe të angazhuar ndaj vlerave perëndimore, Shqipëria ka perspektiva të shkëlqyera dhe është mjaft e rëndësishme të theksohet se BE duhet ta vlerësojë këtë gjë. Dua t’ju përgëzoj edhe për vendimin e Këshillit të BE-së për njohjen e progresit të Shqipërisë duke hapur rrugë për nisjen e negociatave Qershorin e vitit që vjen.”
Si presidente e një shteti mik, Kitaroviç bëri thirrje për bashkim kombëtar për çështjet strategjike.
“Për këtë qëllim është mjaft e rëndësishme të sigurohet një bashkim kombëtar për çështjet strategjike me qëllim që të ruhet motivimi për reformat.”
Kitaroviç tha se Kroacia do të punojë për një tjetër samit BE-Ballkani Perëndimor dhe do të ndihmojë Shqipërinë duke ofruar përvojën e saj.
“Kroacia e përkushton të gjithë vëmendjen e saj drejt zgjerimit të BE-së dhe këto do të jenë pjesë e prioriteteve të presidencës sonë dhe do të bëjmë përpjekje të mëdha për të organizuar një tjetër samit mes Europës dhe Ballkanit Perëndimor. Kroacia do të vazhdojë të mbështesë procesin e Integrimit të Shqipërisë në BE duke i ofruar asaj përvojën e saj dhe duke mbështetur ngritjen e institucioneve.”
Më herët të enjten, Presidentja kroate u prit në Kryeministri edhe nga Kryeministri Edi Rama.
