Pas negociatash të gjata dhe kërcënimeve nga maja e çatisë se do të hidhej poshtë nëse e preknin, ish-presidenti i Gjeorgjisë dhe ish-guvernatori i Odesës, Mikheil Saakashvili, u arrestua nga Shërbimi i Sigurisë i Ukrainës, në Kiev.
https://youtu.be/YfiUgbHvesE
Zëdhënësja e këtij shërbimi, Olena Hitlyanska, i tha Radios Evropa e Lirë, tha se bastisja në apartamentin e Saakashvilit është kryer së bashku me hetuesit e Zyrës së Prokurorit të Përgjithshëm, raporton Rel, duke shtuar se nuk ka pasur ndonjë deklaratë zyrtare lidhur me bastisjen.
Bastisja u bë dy ditë pasi Lëvizja e Forcave të Reja e Saakashvilit ka organizuar një tubim masiv në Kiev, duke kërkuar shkarkimin e presidentit të Ukrainës, Petro Poroshenko.
Protestat fillimisht janë thirrur nga Saakashvili, dikur aleat i Poroshenkos, por atyre u janë bashkuar më pas shumë liderë të partive politike opozitare.
Nga viti 2004 deri më 2013, Saakashvili ka qenë president i Gjeorigjisë, ku tani kërkohet nën dyshimet se ka bërë përpjekjte të organizojë grushtshtet, pasi ka dalë nga zyra. Saakashvili i mohon akuzat.
Në vitin 2015, ai është emëruar nga Poroshenko guvernator i rajonit Odesa dhe ka dorëzuar shtetësinë gjeorgjiane për të marrë postin.
Megjithatë, Saakashvili ka dhënë dorëheqje në nëntor, 2016, duke thënë se përpjekjet e tij për reforma janë bllokuar nga aleatët e Poroshenkos.
Saakashvilit më pas i është marrë shtetësia ukrainase nga Poroshenko – vendim të cilin Saakashvili e ka sfiduar në gjykatë.
Poroshenko tha se qëllimi i vërtetë i organizatorëve të protestave është të destabilizojnë Ukrainën.
