Persona të paidentifikuar kanë tentuar të djegin shtëpinë e gazetarit të njohur Federico Ruffo, ndërsa ky i fundit gjendej brenda. Ata kanë shënuar një kryq në murin e shtëpisë së tij në Ostia, ndërsa kanë tentuar t’i vendosin flakën duke e spërkatur me benzinë.
Për fat të mirë, qeni i gazetarit ka dëgjuar zhurmat dhe ka filluar të lehë. Kjo ka bërë që autorët e ngjarjes të largohen. Ngjarja është regjistruar dy net më parë, ndërsa ka qenë vetë gazetari ai që ka bërë denoncimin.
Shkak për sulmin, mendohet të jetë bërë një investigim i Ruffos, për lidhjet e klanit mafioz italian Ndraghetta me drejtues të lartë të klubit të futbollit Juventus.
Policia ndërkohë ka nisur hetimet në lidhje me ngjarjen dhe ka dokumentuar të gjitha kërcënimet e në drejtim të Ruffos dhe drejtuesit të emisionit Sigfrido Ranucci, në rrjetet sociale.
Ruffo u shpreh në një video të publikuar në rrjetet sociale: “Nëse nuk do të ishte qeni, ata do t’i kishin vënë flakën shtëpisë. Më shpëtoi”.
Më tej ai shtoi: “Atë natë u ktheva vonë. Kaloj pjesën më të madhe në Torino, ata e dinin që unë isha në shtëpi. Po flija gjumë kur dëgjova një zhurmë jashtë. Më pas qeni im filloi të lehtë fort. Zbrita me këmbët zbathur dhe rrëshqita në dyshemenë të spërkatur me benzinë.
Rashë në dysheme, u zhyta në benzinë duke u bërë pis në shpinë dhe këmbë. Më pas dola në kopësht, u afrova pranë derës për të parë nëse autorët po largoheshin dhe aty vendi ishte i spërkatur me benzinë.”
Ruffo ndërkohë ka qenë objekt i sulmeve dhe sjelljeve të pahijshme nga tifozë të Juventusit, për këtë arsye ai është detyruar të shmangë lokalet dhe vendet publike.
