Partizani rimerr vendin e parë në kampionat pasi fitoi me rezultatin 1-2 kundër Kastriotit. Dy golat vendimtar të ndeshjes u shënuan nga Jurgen Bardhi që arriti të mposhte dy herë portierin kundërshtar. Nga krahu tjetër, goli i vetëm për Kastriotin u shënua nga Roger. Takimi ishte i një niveli mesatar dhe pati ritëm vetëm në pjesën e parë, në të dytën ra tempi i lojës.
Ndeshja nis me ritëm të lartë dhe vendasit kërkojnë të surprizojnë të besuarit e Gegës, por në minutën e 19’, Bardhi përfiton mjaft mirë nga një gabim mes portierin Kuka dhe një nga mbrojtësit, duke e dërguar topin në rrjetë.
Goli i dytë për të kuqtë do të vijë në minutën e 36’, është sërish Bardhi që dyfishon, këtë herë me një goditje me kokë pas një krosimi në zonë nga Kote.
Vetëm 1’ minutë më pas Kastrioti shkurton diferencën me brazilianin Roger. Partizani i zënë në befasi. Futbollisti kalon mjaft mirë Gojkovicin dhe i vetëm përballë Hoxhës nuk gabon për 1-2.
Përfundimisht, “demat” fituan me rezultatin 1-2. Partizani rimerr vendin e parë me 28 pikë, ndërsa Kastrioti ndodhet në vendin e fundit me vetëm 4 pikë. Javën e ardhshme, të kuqtë do të luajnë kundër Laçit, ndërsa Kastrioti kundër Kamzës.
Laçi mposht Skënderbeun me rezultatin 2-0 në sfidën e vlefshme për javën e 12-të të Kategorisë Superiore. Golat e Shtubinës dhe Gjonit i dhanë fitoren skuadrës së Memellit në takimin e zhvilluar në “Selaman Stërmasit” përballë Skënderbeut që me këtë humbje ka humbur vendin e parë. Edhe pse korçarët e kërkuan me ngul golin, nuk arritën ta gjenin atë, falë edhe pritjeve vendimtare të portierit Selmani.
Teuta ka arritur të fitojë sërish me përmbysje edhe ndaj Kamzës në transfertë këtë mesjavë. Skuadra e drejtuar nga Bledi Shkëmbi, arriti të merrte tre pikë të rëndësishme, pas fitores 1-3 ndaj Kamzës në trasfertë, në javën e 12 të kampionatit.
