Kombëtarja shqiptare ka zhvilluar seancën e parë stërvitore, në prag të miqësores me Norvegjinë, e cila do të luhet më 26 Mars në “Elbasan Arena”. Por në këtë seancën kanë munguar tre lojtarë mjaft të rëndësishëm për trajnerin Panucci.
Seanca po zhvillohet në kompleksin ‘Tropikal’ në Durrës dhe në 15 minutat e parë trajneri Christian Panucci ka mbajtur një fjalim me lojtarët, ku mendohet se ka shpalosur objektivat. Në këto momente i pranishëm ka qenë edhe presidenti i federatës, Armando Duka.
Ra në sy se në këtë ditë të parë të stërvitjes mungonin 3 futbollistë të thirrur nga Panucci. Etrit Berisha ka disa probleme në kofshë dhe për këtë arsye ka kryer disa vizita të specializuara. Nesër do të mësohet nëse do të jetë i gatshëm për Norvegjinë. Ndërkohë Elseid Hysaj ka marrë leje nga stafi teknik, dhe do të bashkohet nesër me ekipin.
Edhe Berat Gjimshiti nuk ka qenë sot i pranishëm. Mbrojtësi i cili luan me Benevento-n është larguar nga grumbullimi për të shkuar tek të afërmit e tij për shkak të një fatkeqësia familjare. Shtatlarti ashtu si Hysaj do të bashkohet nesër me grupin.
