Sajad Ghabiri është kthyer në sensacion në internet për shkak të fizikut të tij gjigant. Pasi ka marrë pjesë në Wrestling, po mendon të hedhë hapat e parë edhe në MMA dhe në horizont është një përballje me gjigantin Martyn Ford.
Ghabiri njihet si Hulk-u nga Irani për shkak të përmasave të tij trupore. Muskujt e tij janë të paimagjinueshëm, ndërsa në total peshon 180 kilogramë. Tashmë 27 vjeç ka filluar të marrë famë në të gjithë botën. Aktualisht në Instagram ndiqet nga 380 mijë fansa dhe numri rritet ditë pas dite duke parë perspektivën e tij të ardhshme në sportin e MMA.
Çdo gjë në dorën e tij apo çfarë do që është pranë tij duket tmerrësisht e vogël, madje edhe një makinë që i qëndron afër duket jo si një makinë reale por si një lodër. Këto imazhe Ghabiri i shpërndan në rrjete sociale, teksa tregon rutinën e tij të përditshme mes vakteve me vlera ushqyese dhe stërvitjes së pa ndalur.
Ai nuk ka shumë hobe. Gjëja e vetme që ai bën është të ngrejë pesha të rënda. Por, në rininë e hershme ai ka dhënë edhe kontributin e tij kundër Shtetit Islamik (ISIS). Ai u bë pjesë e Forcave të Armatosura të Iranit dhe luftoi në Luftën Civile të Sirisë, shkruan Sportplus.
Në një video ai tha: “Së pari, dua të them se unë jam mbrojtës i vendit tim. Gjeneral Soleimani, të gjithë martirët dhe të gjithë të sakrifikuarit të cilët dhanë jetën për vendin tonë janë heronjtë e mi dhe ne duhet t’i falënderojmë për paqen në vendin tonë.”
Ai shpesh ka postuar foto i veshur si ushtarak apo duke mbajtur armë, të cilat i shoqëronte me fjalët: “Koha për të luftuar armikun”, apo “Unë gjithmonë do të jem ushtar i vendit tim”.
Por, Sajad nuk është vetëm një person që të kall datën kur e sheh. Brenda tij është një zemër e butë. Pika e tij e dobët janë fëmijët, duket se për ta ka një dashuri të madhe, këtë e tregon edhe me përkujdesjen ndaj djalit të tij, të cilin e quan “Bebja Hulk”, por ai viziton shpesh edhe fëmijët që ndodhen nëpër spitale të Iranit duke iu dhënë kurajë dhe mbështetje për të luftuar kundër sëmundjeve.
