Për aq kohë sa ishte pjesë e Skënderbeut, Liridon Latifi arriti një formë të lartë futbollistike. Ishte i jashtëzakonshëm dhe i paparashikueshëm në fushë me topin në këmbë, për këtë arsye arriti ti bënte vend vetes në kombëtaren e madhe. Të gjithë ishin në një mendje asokohe, se Latifi meritonte të luante në nivele të larta.
Nuk zgjati shumë dhe Latifi u largua nga Skënderbeu për t’iu bashkuar ekipit Puskas Akademi. Një eksperiencë e re që u kushtëzua shumë nga dëmtimet, duke e bërë një makth sezonin për sulmuesin. “Më ngelet të shpresoj se nuk do të kem më probleme, sepse ky që po lë pas, ishte i lëndimeve për mua. Sa i përket Kombëtares, është e kuptueshme. Nëse nuk ke minuta, nuk mund të grumbullohesh. Këtë ma ka thënë vetë personalisht Panucci, që nëse nuk do të luaj vazhdimisht, atëherë e ka të vështirë të më ftoj.
Unë e kuptoj vendimin e tij dhe shpresoj se shumë shpejt do kthehem atje ku isha. Futbollistëve të Shqipërisë iu uroj shumë suksese, do të kthehem me ta së shpejti”, shprehej Liridon Latifi, ndërsa kombëtarja shqiptare do të luante përballë Jordanisë dhe Izraelit.
Por tani duket se dëmtimet janë lënë pas dhe Latifi është duke kapur ritmin që ai ka pasur. Në ndeshjen e Kupës ndaj Dunaujavrosh, Latifi arrinte të shënonte golin e parë në atë fitore me rezultatin 0-2, duke qenë një nga më të mirët e takimit. Ky është momenti i duhur që Liridoni të kthehet në formë të mirë dhe ti bashkohet kombëtares, duke parë edhe numrin e madh të dëmtimeve që kanë kuqezinjtë, talenti i Latifit do të ishte një bonus për Panuccin.
