Besimtarët myslimanë festojnë sot Kurban Bajramin. Besimtarët myslimanë e kanë falur namazin e Kurban Bajramit në sheshin “Skënderbej”, e ndërsa kanë shkëmbyer me njëri-tjetrin mesazhe paqeje e harmonie, si dhe lutje për më shumë begati.
Besimtarët janë mbledhur në shesh rreth orës 05:30 për faljen e Namazit, ndërsa lutja ka nisur në orën 07:00.
Kryetari i Komunitetit Mysliman Shqiptar, Skënder Bruçaj, iu drejtua të gjithë shqiptarëve me një urim, ku tha se Kurban Bajrami është festë e sakrificës, ndërsa theksoi domosdoshmërinë e ndarjes së Kurbanit, me nevojtarët.
“Le t’i gëzohemi së bashku kësaj dite të begatë, në të cilën shpresat, dëshirat dhe ëndrrat tona kthehen nga i plotfuqishmi dhe realizimi i këtyre aspiratave le të pasqyrohet në aktet dhe veprimet tona, në ndihmë të atyre që kanë nevojë për dashurinë dhe vëmendjen e të gjithëve ne”, tha Bruçaj.
Xhamia e Madhe e Tiranës ende nuk ka përfunduar, e cila do të ketë një sipërfaqe prej 6000 metrash katrorë, ndërsa në të mund të falen njëkohësisht mbi 5000 besimtarë.
