Mafia siçiliane, ka qenë gjithmonë e lidhur me fshatin dhe tokën. Në fillim të viteve 1800, mjeku anglez Xhejms Lind, zbuloi se konsumi i limonit ndihmonte në shërimin nga sëmundja e skorbutit. Asokohe, kjo sëmundje vriste shumë njerëz, sidomos marinarët e anijeve.
Zbulimi solli një rritje të madhe të kërkesës për limona. Siçilia, ishte një ndër rajonet kryesore të prodhimit të limonave në Evropë. Të ardhurat e mëdha të pronarëve të fermave, nxitën lakminë e shumë njerëzve, që nisën t’i sulmonin dhe grabisnin.
Kështu, pronarët u detyruan të punësonin roje sigurie nga të ashtuqujturit “uomini d’onore” (burra nderi), duke ndarë me ta dhe një pjesë të fitimeve. Në të kundërt, do të kërcënoheshin deri në largimin nga vendi, ose do të vriteshin. Nga të dhënat arkivore rezulton se vetëm në vitin 1874, në lagjen Uditore në Palermo, me vetëm 800 banorë, pati 23 vrasje dhe 10 plagosje.
Në lindjen e mafias, ndikuan edhe strukturat e dobëta shtetërore, që pas pavarësisë dhe bashkimit të Italisë, e patën të vështirë të shtrijnë sundimin e ligjit në ishullin e Siçilisë. Familja Greko, një nga familjet më të mëdha mafioze në Itali në shekullin XIX edhe më pas në SHBA në shekullin XX, e nisi aktivitetin e vet falë të ardhurave që merrte nga limonat e kultivuar në fermën Tagliavia.
