Të gjithëve na ka ndodhur të shkojmë vonë në punë, por a ju ka vrarë ndonjëherë ndërgjegjja aq shumë sa të mendoni të jepni dorëheqjen?
Kjo i ka ndodhur politikanit britanik, lordit Michael Bates, i cili ka dhënë dorëheqjen, pasi mbërriti me 2 minuta vonesë në Dhomën e Lordëve.
Duket se ministri britanik i Departamentit të Zhvillimit Ndërkombëtar është ndjerë i turpëruar nga vonesa, teksa tha:
“Dua t’i shpreh ndjesën time të sinqertë baroneshës Lister që nuk isha në vendin tim, për t’iu përgjigjur pyetjes së saj për një cështje shumë të rëndësishme. Gjatë 5 viteve ka qenë privilegji im t’u përgjigjem të gjithë pyetjeve nga kjo foltore në emër të qeverisë. Më vjen turp që nuk isha në vendin tim, prandaj do t;o paraqes kryeministres dorëheqjen time”, tha Bates, i cili është larguar nga foltorja.
Por, kjo deklaratë ka shkaktuar reagime nga të pranishmit në sallë, të cilët nuk e prisnin atë, duke u përgjigjur njëzëri “Joooo!”.
Siç duket në video, shumë prej të pranishmëve u habitën, ndërsa një prej tyre u përpoq të kapte Bates nga krahu për të mos e lënë që të largohej, por ministri iku.
Pas dorëheqjes së bujshme, baronesha Smith tha se ndjesa nga ana e Bates ishte e mjaftueshme, duke shtuar se i ka kërkuar atij që të rishqyrtojë vendimin e tij.
“Nga të gjithë ministrat që do të dëshiroja të shkaktoja dorëheqjen e tij, Bates do të ishte i fundit”, tha ajo.
Megjithatë, Kryeministrja britanike Theresa May, e cila është në një vizitë tregtare në Kinë, ka refuzuar dorëheqjen e lordit Bates, pasi e ka konsideruar të panevojshme atë.
