Basel arriti të fitonte lehtësisht dje përballë Zyrich në kampionat me shifrat e thella 3-0. Përveç dëmtimit të Taulant Xhakës, ajo që ra në sy ishte festa e mbrojtësit paraguaian Blas Riveros i cili realizoi golin e parë.
Ai bëri me duar simbolin e shqiponjës, duke dhënë përshtypjen se ishte një dedikim për Albian Ajetin, futbollistin shqiptar që i dhuroi asistin, por në fund nuk ka rezultuar kështu. Por në vazhdim, u sqarua se përse futbollisti i Basel-it kishte festuar në të tillë mënyrë. Për të mbajtur premtimin ndaj një miku.
“E bëra se ia kisha pretuar një shoku, emri i tij është Bashkim. Ai punon në një qendër tregtare. E njoh prej gati gjysmë viti. Ai më kërkoi që të bëja shqiponjën nëse shënoja”, u shpreh Riveiros për zviceranen Blick. Paraguaiani realizoi golin e parë në fitoren 3-0 të skuadrës së tij kundër FC Zurich. Aktualisht te Basel luajnë dy shqiptarë, Albian Ajeti si edhe Taulant Xhaka.
