E shtuna ka qenë dhe vazhdon të jetë një garë e hapur mes dy ekraneve më të ndjekura, Top Channel dhe Tv Klan. Më shumë se një luftë e fshehur, është kthyer në humor në të gjithë rrjetin mes moderatorëve që drejtojnë programet respektive në primetime. Vitin e kaluar, Ermali i shpalli luftë hapur Arbana Osmanit kur ajo nisi në të njëjtin orar me të të shtunave Big Brother, ndërsa këtë vit, në fillim të sezonit, ishte Luana ajo që i doli përballë dhe i shpalli sfidë të hapur Ermalit me “Shiko kush luan.”
Në një kohë kur programi i Luanës i ka lënë vendin Arbana Osmanit me “Dua të të bëj të lumtur”, Ermali nuk i harron lehtë inatet dhe ngacmimet në rrjetet sociale. Mbrëmjen e djeshme, ai kishte të ftuar Gent Hazizin, aktorin i cili ka bashkëpunuar përgjatë të gjitha javëve të “Shiko kush luan” me Luana Vjollcën. Pas shumë ngacmimeve për programin dhe për moderatoren, si për t’i vënë vulën konkurrencës, përballë Gentit erdhi Kejvina me pyetjet e saj pikante. Këtë herë, pyetja kishte të bënte drejtpërdrejt me Luanën: “Kush është më seksi, unë apo Luana?” – i tha ajo Gentit, i cili, i zënë ngushtë, duhet të zgjidhte, shkruan Revista Class.
Me shumë vështirësi, edhe nga fakti që Ermali mbante në dorë një shkop gome, Genti tha: “Unë e di që jam mysafir te programi yt. Të dyja vajzat janë seksi, por nëse do zgjidhja, do preferoja Luanën…”.
Natyrisht, Ermali nuk priste një përgjigje të tillë, por Genti nuk e fshehu diplomacinë: “Epo do fillojë prapë “Shiko kush luan”, i mbetet hatri Luanës.”
