Shfaqja e shëmtuar e të enjtes në Bularat, ishte një ngjarje e paralajmëruar. Dihej prej ditësh ardhja e qindra grekëve ekstremistë nga Athina dhe Selaniku. Por ata u lejuan, si për t’i treguar botës se ne nuk jemi si ata. Megjithatë kjo epërsi morale, nuk ka dhe aq vlerë. Athina nuk u distancua qartazi nga thirrjet ekstremiste të qytetarëve të saj.
Ndërsa Edi Rama u akuzua sërish si provokator me deklaratat e tij. Frika është se ngjarje të tilla, mund të jenë një ritual i përvitshëm në varrezat e ushtarëve grekë në Shqipëri. Ngritja e tyre, ishte një “haraç” që duhej ta paguanim për normalizimin e raporteve me fqinjin tonë jugor. Por kjo na ka vendosur para një dileme: Të vazhdojmë të durojmë shfaqje të tilla shoviniste në vendin tonë, apo t’i zhvarrosim ushtarët grekë dhe t’i dërgojmë të prehen përfundimisht në vendin e tyre?
