Racizmi dhe diskriminimi që kanë pësuar shpesh emigrantët shqiptarë në Greqi, ka prodhuar jo pak drama. Ndër më të bujshmet kanë qenë ato të Flamur Pislit dhe Arben Cufajt në vitin verën e vitit 1999. I riu nga Mati u fut në kurth nga pronari i një fabrike këpucësh, gruaja e të cilit ishte lidhur me vëllain e tij.
Pasi dhunohet fizikisht dhe seksualisht në komisariatin e Selanikut, Pisli dëbohet në Shqipëri, pa arritur të marrë lekët nga puna e tij në një fshat grek. I shpërfillur nga autoritetet, ai vendos të vërë vetë në vend nderin e nëpërkëmbur. Më 28 maj, merr peng një autobuz me disa pasagjerë. Pas më shumë se 20 orësh udhëtimi nga Greqia në Shqipëri, Pisli vritet në Elbasan nga forcat speciale shqiptare.
Bashkë me të gjen vdekjen edhe pengu grek Jorgos Kuluris. Ndërkohë më 16 korrik emigranti shqiptar Arben Cufaj, 23-vjeç, merr peng në Athinë, i armatosur me 2 granata, një autobus grek me 25 pasagjerë. Ai akuzonte një polic grek se i kishte rrëmbyer librezën me kursimet e 9 viteve punë në Greqi, dhe i kishte djegur padrejtësisht lejen e qëndrimit. Në një skenar gati identik, i riu shqiptar vritet në afërsi të Follorinës, këtë herë nga forcat speciale greke, pas dështimit të negociatave për t’u dorëzuar.
