Edon Zhegrova, talenti i madh që u bë “mollë sherri” mes Kosovës dhe Shqipërisë në javët e fundit, ka bërë një debutim fantastik tek Dardanët duke shënuar një gol fantastik. Gol që sjell edhe fitoren e parë në ndeshjen e parë për trajnerin zviceran, Bernard Challandes, ku përballë kishin Madagaskarin.
Pjesa e parë ishte disi e ekuilibruar, por lojtarët kosovarë treguan një klas të lartë dhe lenë të kuptohet se një e ardhme e ndritur i pret. Në minutën e 35’ miqtë kishin rastin më të mirë për të kaluar në avantazh, por për fat gabojnë përballë Ujkanit dhe topi përfundon jashtë.
Pak çaste më vonë, Ujkani kryen një ndërhyrje vendimtare, duke shmangur një gol të sigurt. Sapo nisi pjesa e dytë, Zhegrova befasoi portierin e Madagaskarit me një goditje të shpejtë paksa prirët me portë, me topin që përshëndeti rrjetën.
Në minutat në vazhdim të dyja skuadrat patën raste për të shënuar, por rezultati mbeti i pandryshuar. Bernard Challandes e nis me këmbën e mbarë eksperiencën e tij në krye të Kosovës, që katër ditë më pas do të provojë forcat me Burkina Fason po në Francë.
“Djaloshi magjik”, Edon Zhegrova, që ishte edhe njeriu i ndeshjes u shpreh se: “Ishte një ndjenjë shumë e bukur të luaj për vendin tim. Emocion shumë i veçantë të shënosh gol në ndeshjen e parë. Edhe djemtë treguan që kanë shumë cilësi dhe shpresoj të vazhdojmë kështu. U befasova që isha titullar, golin ua dedikoj të gjithë kosovarëve kudo që ndodhen.”
