Vizita e Nënë Terezës në Shqipëri në verën e vitit 1989, habiti shumëkënd në Shqipëri. Për 45 vite, asaj i ishte ndaluar hyrja në vend, për të takuar nënën dhe motrën e saj. Por gazetarja italiane Alessandra Nucci, duke iu referuar dëshmisë së shqiptarit Marcel Hila, pretendon se shenjtorja shqiptare erdhi në Shqipëri, me kërkesën e vetë vejushës së Enver Hoxhës, Nexhmijes.
Ajo ishte e shqetësuar nga dëshmitë e dhjetëra ushtarëve të Gardës së Republikës, mbi atë që sipas tyre ndodhte netëve në varrin e diktatorit. Lidhur me këtë, Hila kujton vetë një bisedë me një nga ish-gardist, që ishte dërguar në repartin e tij ushtarak. Ai tregoi se kishte bërë për disa kohë roje tek varri i Hoxhës, ku përnatë dëgjoheshin ulërima, britma dhe rënkime që vinin nga nëntoka.
Sipas gardistit, 20 kolegë të tij ishin shtruar në psikiatri nga shoku i pësuar. Hila tha se misionin e veçantë të Nënë Terezës atë vit, ia konfirmoi Dom Gjergji më 1993-in, që e kishte shoqëruar Nënë Terezën gjatë vizitës historike. Sipas tij, pas një takimi formal me Nexhmijen kjo e fundit e shoqëroi tek varri i të shoqit, ku Nënë Tereza u përkul dhe u lut për disa minuta. Vetëm pas këtij gjesti, nuk pati më dëshmi për fenomene paranormale në atë varr. Dhe Nënë Tereza u lejua që të vizitonte varrin e së ëmës dhe motrës së saj, të vdekura përkatësisht në vitet 1971 dhe 1974.
