Kryeprokurorja Arta Marku ka kaluar sitën e Vetting-ut, duke u rikonfirmuar në detyrë. Pak çaste më parë, KPK njoftoi vendimin pas procesit të rivlerësimit të figurës së kryeprokurores Arta Marku, të cilën e ka rikonfirmuar në detyrë.
Trupë gjykuese në Komision ka qenë Genta Tafa Bungo, Pamela Qirko dhe Suela Zhegu. Ndonëse është njeriu më i rëndësishëm i organit të akuzës, Arta Marku nuk pati forcë të dalë përballë Vetting-ut. Sikundër edhe një ditë më parë, edhe sot, vetë kryeprokurorja Marku nuk ishte prezente, por ajo u përfaqësua nga avokatja Lirime Çukaj.
Në lidhje me tre komponentët, KPK nuk ka konstatuar probleme, pavarësisht se një kërkesë e saj për masë “arrest me burg” dy herë për një person që ishte kapur në gjendje te dehur, u komentua si ekstreme.
Dy nga shtyllat e Vetting-ut, pasuria dhe figura dolën të pastra për Prokuroren e Përgjithshme. Në shtyllën e tretë të aftësive profesionale, trupa u ndal tek kërkesa ekstreme e “arrestit me burg”, kërkuar nga Arta Marku gjatë kohës që ishte prokurore në Shkodër. Shtetasi me inicialet A.B., ishte arrestuar për drejtim në gjendje të parregullt të mjetit, e për këtë arsye Marku kishte kërkuar dënimin me dy vjet burgim.
KPK deklaroi se prokurorja nuk e kishte argumentuar këtë masë ekstreme, ndërsa e pavend u pa edhe nga vëzhguesi i huaj. Sipas tij, prokurorja duhet të mendohet dy herë kur kërkon “arrest me burg”, për aq sa edhe Gjykata e Lartë urdhëron caktimin e kësaj mase, atëherë kur vepra është e rrezikshme.
Relatorja Zhegu tha se KPK ka bërë hetim administrativ për pasurinë e Markut, që perfshin një apartament 103 metra katrorë me vlerë 5 mln lekë në qytetin e Shkodrës. Marku ka 50 perqind të apartamentit të blerë me kredi. dhe i kanë mbetur edhe 2 mln lekë për të shlyer.
“Ne lidhje me figurën DSIK ka kryer kontroll dhe ka dërguar një raport i cili e gjen zonjën Marku të pershtatshme për detyrën. Vleresimi profesional i kryer nga prokuroria e përgjithshme per Markun ka qenë “shumë mirë nga 2003 deri ne 2016”, ka deklaruar relatorja Zhegu më herët.
Sipas relatores Zhegu, ne vitin 2016, Marku si prokurore në Shkodër ka kërkuar “arrest me burg” për një shtetas me inicialet A.B., që akuzohej per drejtim mjeti në mënyrë të parregullt. Kjo mase vleresohet si ekstreme, tha relatorja një ditë më parë.
“Nga konventat europiane qe i kemi ratifikuar. Subjekti i rivleresimit nuk ka bere një shtjellim të qartë se perse i pandehuri A.B., duhet të qëndronte në burg për drejtim mjeti në menyre të parregullt. Kjo mase arresti me burg vlerësohet si ekstreme nga KPK gjithashtu”, tha Zhegu.
Seanca dëgjimore e një ditë më parë u shoqërua nga replikat mes përfaqesuesit të ONM, Theo Jacobs dhe avokates së kryeprokurores, lidhur me një ankesë të një qytetari, i cili është mbajtur në qeli me kërkesë të Arta Markut, pasi ishte ndaluar duke drejtuar automjetin në gjendje të dehur. Jacobs tha se paraburgimet në Shqipëri janë të tejmbushura dhe kjo edhe si rrjedhojë e rolit të prokurorëve në hetimin penal.
