Mundësitë për mjete të tjera alternative veç makinave në Tiranë për të lëvizur brenda qytetit thuajse nuk ka. Një pjesë e mirë e qytetarëve refuzojnë të lëvizin me urban dhe kanë vendosur të përdorin biçikleta. Në kryeqytetin e rrëmujshëm të shqiptarëve nuk ka shumë rrugë për të pedaluar dhe ka shumë probleme të tjera, por një pjesë e mirë e qytetarëve kanë vendosur sërish të dalin me biçikleta.
Shumica e atyre që pedalojnë në kryeqytet veç mungesës së rrugëve hasen me një problem të madh: vjedhjen e biçikletave. I tillë është rasti i denoncuar në redaksinë e Tirana Today.
Më datë 2 tetor, në orën 06:30 të mëngjesit, një qytetari i është vjedhur biçiketa në Bllok. Vjedhja ka ndodhur në rrugën “Brigada VIII”.
Në video duket mjaft qartë mënyra e vjedhjes dhe qetësia e hajdutit, i cili duket i veshur mirë dhe i mbajtur, por në të vërtetë ai ju “bën gjëmën”. Duket se për hajdutin nuk është hera e parë. Siç duket në video, ai është i pajisur me një gërshërë metal prerëse. Pasi kontrollon zonën që nuk ka njeri pret zinxhirin e metalit i qetë. Për të fituar para edhe nga zinxhiri për ta shitur si metal, e merr dhe atë me vete.
Pronari i biçikletës ka bërë denoncim në polici, por akoma nuk është zbuluar identitetit i autorit.
Mesatarisht në Tiranë sipas disa raporteve të policisë vidhen diku tek 8 biçikleta në ditë. Në shumicën e rasteve vjedhja është e pa filmuar nga kamerat.
