Edhe pse Shqipëria ndërpreu marrëdhëniet “vëllazërore” me Jugosllavinë në vitin 1948, ndikimi i Beogradit vazhdoi të ishte i madh. Shërbimi sekret UBD, arriti të rekrutojë mijëra shqiptarë të arratisur nga Shqipëria komuniste, dhe shumë të tjerë brenda Shqipërisë. Drejtues të lartë të ish-Sigurimit të Shtetit, konfirmojnë ekzistencën e një rrjeti agjenturor deri në udhëheqjen e lartë komuniste.
Hasan Luçi hedh dyshime mbi Kadri Hazbiun dhe Feçor Shehun. Djali i vogël i Enver Hoxhës dhe bashkëshortja e tij, akuzojnë Nexhmije Hoxhën dhe Ramiz Alinë si kryeagjentët e UDB-së në Shqipëri. Shërbimi jugosllav, akuzohet deri edhe për vrasjen e ngadaltë të diktatorit, një akuzë kjo e rëndë, por e pabazuar deri tani në fakte. Ai bëhet përgjegjës për rebelimet nëpër burgjet e diktaturës, arratisjet, sabotimet në ekonomi.
Por ndikimi më i madh i UDB-së në Shqipëri i përket pikërisht viteve 1990-1992, kur siç u pranua edhe nga mediat serbe vitet e fundit, shërbimi sekret jugosllav dha 20 milionë dollarë për destabilizimin e Shqipërisë. Kjo do të bëhej përmes ndezjes së gjakrave, deri në pikën që në vend të shpërthente lufta civile. Incidenti më i rëndë, kur kjo u duk e afërt, ishte masakra e 2 prillit 1991, në Shkodër, ku policia qëlloi mbi protestuesit demokratë në shesh duke vrarë 4 prej tyre.
Dyshohet se shumë dosje të ish-Sigurimit që kanë lidhje me veprimtarinë e UDB-së, janë zhdukur. Në këto kushte UDB përdorej shpesh si një ”gogol” në luftën politike. Sali Berisha është akuzuar shpesh si agjent i UDB, si i rekrutuar që në vitin 1970. Vetë ai ka akuzuar babain e Edi Ramës, Kristaq Ramën, si agjent të KGB-së sovjetike.
