Prej disa vitesh importi i mishit në vendin tonë është kthyer në një problematikë për konsumatorët. Sipas Autoritetit Kombëtar të Ushqimit vetëm në 5 muajt e parë të vitit, janë bllokuar 130 ton mish derri, gjedhi dhe pule. Të gjitha të ardhura nga jashtë, duke synuar tregun e brendshëm. Në këtë situatë përherë e më shumë qytetarët ankohen për pasiguri ushqimore.
Por, favorizimi i importit duket se ka prekur edhe fermerët të cilët ankohen për mosmbështetje. Një prej tyre është Arbeni i cili prej afro 30 vitesh merret me rritjen e dhive.
“Mishi që vjen nga jashtë nuk ka asnjë sigurie. Një qytetarë kur blen nuk e dallon dot lehtësisht nëse mishi është vendi apo i sjellë nga jashtë. Ai kur vjen në pazar do të shkojë tek ai që e shet më lirë, nuk do të vijë te unë. Që e kam prodhim vendi dhe e kam shumë më të sigurt, pasi jam kujdesur vetë që prej fillimit. Ky është problemi ynë kryesor, që mishi që vjen nga jashtë është i pakontrolluar dhe e shesin këtu brenda. Duke na konkurruar në mënyrë të padrejtë.
Madje dhe shteti është duke i dhënë më shumë përparësi mishit që vjen i importuar. Pasi neve nuk na jep asnjë përparësi apo mbështetje.”
47 vjeçari nga Lezha thotë për Tirana Today se asnjëherë nuk e ka të sigurt shitje e prodhimit pasi nuk ka një treg të sigurt. Dhe prej vitesh i duhet të dalë në tregun e Milotit dhe pse është në gjendje të keqe.
“Tregu i Milotit është në mëshirë të Zotit. Por, nuk është vetëm ai problemi. Pasi këtu nuk ka tregje dhe ne e kemi shumë të vështirë të shesim. Dalim në pazar dhe kur mundemi marrim ndonjë fitim, por është shumë e vështirë.” TIRANA TODAY
