Mësohet se Burim Kukeli mund të kthehet në qendërmbrojtës në radhët e Zyrihut në kampionatin zviceran të futbollit. Edhe pse flitej se do të ishte një nga “veteranët” që do të sakrifikoheshin në këtë edicion, trajneri Uli Forte i ka besuar futbollistit shqiptar një vend në formacion në prapavijën me tre, në një skemë të re që ka ndihmuar Zyrihun të fitonte 2-0 derbin në fushën e Grasshopers. Ai luajti gjatë 90 minutave në këtë sfidë duke zhvilluar një ndeshje të mirë, të “njollosur” vetëm nga kartoni i verdhë në minutën e 71-të të takimit.
Trajneri i ka gjetur një rol të ri, në të cilin është provuar në fakt edhe në ndeshjet e Kombëtares shqiptare, duke e parë tani e tutje si një alternativë më shumë për prapavijën e Zyrihut.
Sezonin e ka nisur me fitore edhe Sioni i Paolo Tramexanit, i cili fitoi 1-0 në fushën e Tun. Ekipi i drejtuar nga ish-zëvendëstrajneri i përfaqësueses shqiptare, mori tri pikë të rëndësishme në transfertë falë golit të Konate në pjesën e parë të ndeshjes.
http://www.dailymotion.com/video/x5ukhwh
Lucerna e Kryeziut mundi 1-0 Luganon. Mbrojtësi Dren Feka luajti vetëm 60 minuta para se të zëvendësohej nga trajneri Babel, ndërsa mesfushori i përfaqësueses së Kosovës luajti që nga minuta e parë këtë sfidë.
http://www.dailymotion.com/video/x5ukcg4
