Të rinjtë e Partisë Demokratike kanë zhvilluar një protestë për rritjen e çmimit të ujit para Bashkisë së Tiranës.
Me dhjetëra të rinj me bidona në duar kanë dalë kundër vendimit të Këshillit Bashkiak të Bashkisë së Tiranës e cila dy ditë më parë vendosi për rritjen e çmimit të ujit.
Të rinjtë kanë brohoritur në kor “ Jeni hajdutë, lali leku etj”. Gjithashtu, në duar kishin dhe pankarta si “duhet të shërbesh që të paguhesh”.
Në fund të protestës të rinjtë kanë hedhur budonat dhe pankartat që mbanin në duar në hyrjen e bashkisë së kryeqytetit.
Sipas projektit fillestar të propozuar nga Bashkia, parashikohet një rritje çmimi me 44%, nga 45 lek/ m3 në 65 lekë/m3 ujë.
Sipas Veliajt, kjo rritje e çmimit bëhet që të kryhen investime në rrjet, në mënyrë që të garantohet furnizimi 24 orë me ujë në kryeqytet.
Enti Rregullator i Ujit bëri me dije se do të vendosë në muajin shtator mbi aplikimin e bërë nga Ujësjellës-Kanalizime Tiranë për rritjen e çmimit të ujit.
