Kryeministri Edi Rama ka inspektuar Rezidencën Studentore Universitare nr. 2, ku paralajmëroi se vaksinimi për studentët do të bëhet i detyrueshëm.
Ai tha se vaksinimi është një nevojë, nëse duam të vazhdojë rrjedha normale e jetës akademike, praktikë kjo e ndjekur dhe nga vende të tjera.
Kryeministri Edi Rama ka ndarë në Facebook një video, ku shihet së bashku me ministren Kushi duke vizituar ambientet brenda. Në postimin e tij, Rama shprehet se vaksinimi do jetë i detyrueshëm për studentët që do nisin vitin e ri Akademik, për shkak të situatës epidemiologjike në vend.
“Duhet të komunikojmë intensivisht në të gjithë rektoratet, është se mund të vijë momenti duke pasur parasysh edhe çfarë po ndodh nëpër botë dhe rritjen e numrave, rreziqet që paraqet varianti i ri Delta që vaksinimi për studentët që hyjnë në auditore do të jetë i detyrueshëm dhe do të duhet që t’ju komunikohet kjo vijimësisht që nëse vjen momenti, të mos thonë pse s’na thatë.
Këtu s’ka “dua, s’dua” se për të gjithë ata që kanë pjesë të aktivitetit të tyre, të qenit bashkë me të tjerë, është përgjegjësi që nëse për veten e tyre mund të thonë që s’duan t’ia dinë, të tjerët nuk mund t’i marrin në qafë.
Është e pamundur të lejojmë që të kemi përshkallëzim të panevojshëm të numrave dhe pastaj të shkojmë në masa që kurrë nuk duhet të kthehen mbrapsht në Shqipëri”.
