Vllaznia ka triumfuar 4-0 përballë Apolonisë, në ndeshjen finale të vlefshme për Kupën e Shqipërisë të luajtur në “Elbasan Arena”.
Mirëpo kupa nuk u ngrit nga kapitenia Megi Doçi siç tradita e kërkonte, por nga portierja Ardiola Raxhimi, e cila është shtatzënë. Barku i rrumbullakët që kishte filluar të duket edhe sipër bluzes së gjerë të uniformës, nuk e pengoi portieren shkodrane që të zbriste në fushë për t’i dhënë fitoren skuadrës së saj.
Në përfundim të ndeshjes, e lumtur për fitoren, Raxhimi zbuloi edhe ‘sekretin’.
“Një sekret i vogël. Mund t’ia kemi bërë me hile, pasi ne kemi luajtur me “12 vetë”, pasi unë së shpejti do të bëhem me një bebe”, tha ajo.
