Një incident ka ndodhur në ishullin e njohur të Santorinit, ku po zhvillohej një paradë shkollore.
Disa mbështetës të ekstremit të djathtë “Agimi i Artë” kanë ndërhyrë me arsyetimin se flamurin po e mbante një nxënëse shqiptare.
Kështu, rreth 20 persona me bluza të zeza kanë ndërhyrë duke protestuar dhe pyetur se përse flamurin e mbante një fëmijë shqiptar.
“Jemi grekë dhe flamurin duhet ta mbajmë ne,” ishin thirrjet që dëgjoheshin nga ekstremistët e “Agimit të Artë”.
Të pranishmit kanë ndërhyrë duke i kundërshtuar ekstremistët e djathtë, por më kot pasi parada ishte prishur dhe prindërit u detyruan të largojnë fëmijët e tyre nga vendngjarja.
“Dega e Santorinit e Agimit të Artë dhe qytetarë vendas e ndërprenë paradën në shenjë proteste energjike për fyerjen e simbolit kombëtar (flamurit), dhe duke theksuar se nuk do të lejojnë fenomene të tilla antigreke në ishull”, thuhet në njoftimin e Agimit të Artë në faqen zyrtare.
Ky akt u dënua me forcë nga partitë e tjera greke, ndërkohë që Ministria greke e Arsimit deklaroi se patriotizma të tilla ekstreme nuk kanë vend në shoqërinë greke.
