https://www.facebook.com/tiranatodaycom/videos/333633063748104/
I gjithë vendi është përfshirë nga flakët, kur çdo ditë konstatohen raste të reja të vatrave të zjarrit. Temperaturat e larta, zjarrvëniet e qëllimshme e kanë kthyer vendin në një situatë alarmante sa i përket përballjes me zjarrin.
Por, gjendja bëhet edhe më shqetësuese kur bashkitë konstatojnë mungesën e tyre logjistike për të shuar zjarret. Apo kur shërbimi zjarrfikës në qytete dhe fshatrat e ndryshme të vendit mungon dhe në shumicën e rasteve nuk është fare i pranishëm.
Pavarësisht ndërhyrjes së Forcave të Ushtrisë, dhe shërbimeve gjysmake të zjarrfikëseve, kryetarët e disa bashkive në vend kosntatojnë dështimin e plotë përballë flakëve që kanë pushtuar pyjet në vend.
Altin Toska, kryetari i bashkisë së Cërrikut: Bashkia e Cërrikut ka një territor prej 186 km katrorë, tërësisht të pambuluar me këtë shërbim dhe mundësitë tona për ta krijuar një repart zjarrfikës janë të pamundura, pra janë zero”.
Arif Tafani, kryetari i bashkisë së Belshit: Bashkia e Belshit ka zero mundësi për të ndërtuar dhe për të mbajtur një stacion zjarrfikësish. E them këtë për shkak të mungesës së fondeve.
Qazim Sejdini, kryetar i bashkisë së Elbasanit: Është për të ardhur keq që ky repart ka 5 makina zjarrfikëse të vitit 1975-1976. Zjarrfikëseve u mungon baza materiale dhe veshjet. Mungon një kompresor që shërben për mbushjen e bombolave dhe aparateve hermetike. Ka edhe mungesë të pajisjeve ndihmëse të mjeteve zjarrfikëse, si tubat apo fikset portative të zjarrit.
Situata e konstatuar për Top Channel, nga të tre kryetarët e bashkive të Qarkut të Elbasanit, vërehet edhe në qarqe e tjera të vendit. Në Dukat të Vlorës, forcat e shuarjes së zjarrit përdorin mjete rrethanore.
Ashtu siç evidentohet nga videoja e dërguar në redaksinë e “Tirana Today”, forcat e emergjencave civile përdorin degë pemësh, gurë dhe mjete të tjera rrethanore për të asgjësuar flakët, duke vënë në rrezik edhe jetët e tyre. Ndërsa temperaturat vijojnë të jenë të larta, humbja e betejës me flakët po bëhet edhe më prezente. Ndërsa vendi po humb hektarë të tërë me pyje dhe kullota.
