Një shpërthim i fuqishëm me tritol në Shkodër ka shkaktuar plagosjen e disa personave. Ngjarja ka ndodhur në lagjen “Rus” të qytetit verior mëngjesin e sotëm.
Burime nga policia e Shkodrës konfirmojnë për tvklan.al se eksplozivi ishte vendosur tek një motorçikletë e parkuar përpara një biznesi në një rrugicë.
Nga shpërthimi i tritolit është dëmtuar edhe një makinë (fuoristrada e bardhë që shikoni në foto), e cila ka qenë e parkuar aty pranë në momentin e ngjarjes. Nga shpërthimi i fortë dyshohet për tre persona të plagosur, të cilët kanë shkuar në spital për mjekim dhe ndodhen jashtë rrezikut, shkruan tvklan.al.
Po kështu ka edhe dëme të konsiderueshme materiale. Nuk ka ende informacion se kush ka qenë shënjestra e atentatit. Policia tashmë ka nisur hetimet për të zbardhur tërësisht këtë ngjarje të rëndë.
