Shkatërrohet në vetëm 3 sekonda fortesa luksoze e ish-kapos së drogës kolumbiane Pablo Escobar, në Medelin. Shkatërrimi i kontrolluar u bë pas vendimit të autoriteteve vendase për të ndërtuar një park dedikuar viktimave të narkotrafikut.
Plot 25 vjet nga vdekja e Escobar u bë shkatërrimi i godinës 8-katëshe, me plot 1600 persona dëshmitarë, kryesisht fëmijë dhe nipa të personave të vrarë me urdhër të Escobar. Për shkatërrimin e fortesës është përdorur 200 kg eksploziv.
“Nuk bëhet fjalë për të shkatërruar një zyrë që është në rrënim e sipër dhe bie, por për të ngritur një memorial për ata që duhet të jenë heronjtë tanë që nuk duhen harruar kurrë”, tha kryebashkiaku i Medelin, Federico Gutiérrez.
Në vendin ku qëndronte godina do të instalohet skulptura “Jeta e re” e artistit Rodrigo Arenas Betancourt, një lapidar në homazh të 46.612 viktimave të luftës së drogës në qytet.
