Trafikimi i organeve njerëzorë mbetet një problem madhor në të gjithë botën, sidomos në vendet e varfra. BBC ka publikuar së fundmi një intervistë me një trafikant organesh njerëzore nga Egjipti.
Ky i fundit pretendon se çdo javë kryen të paktën 20-30 transplante të veshkave në mënyrë të paligjshme.
Sipas BBC, veshkat që marrin janë nga refugjatët dhe emigrantët afrikanë, të cilët i shesin pasi u duhen lekët për emigrimin drejt Evropës. Trafikanti tha për gazetarët se pothuajse gjysma e dhuruesve nuk u paguan pas operacionit, duke qëndruar me një veshkë dhe pa para.
Disa prej atyre që kanë pranuar të shesin një veshkë, kishin rënë dakord ta shisnin përkundrejt shifrës që u duhej për udhëtimin e tyre drejt vendeve të Evropës.
Dokumentari përpiqet të gjurmojë rrugën për në klinikat dhe spitalet, ku kryhen këto transplantime të paligjshme.
“Isha në një dhomë pas operacionit. U zgjova duke ulëritur. Ne duhet të jemi të kujdesshëm”, ka deklaruar një emigrant i cili e ka gjetur veten me një veshkë pa e kuptuar.
