Familjarët e Konstandinos Kaçifas vijojnë akuzat ndaj forcave RENEA. Së fundmi, është një kushëri i viktimës ai që deklaron se 35-vjeçari u qëllua dy herë në kraharor nga një distancë shumë e afërt nga forcat speciale shqiptare.
“Duket sikur ai u doli përballë dhe u tha ‘Ja ku jam, nuk kam frikë, më vrisni nëse keni guxim’ dhe ata e vranë”, tha Vangelis Vangitis, një i afërm i Kaçifës.
Deklaratat e tij tronditëse erdhën menjëherë pasi autoritetet shqiptare lejuan të afërmit e viktimës të shihnin trupin në morgun e spitalit të Gjirokastrës.
“Ai mori dy të shtëna pranë zemrës nga një armë zjarri e kalibrit të madh. Një armë e fuqishme nga një distancë e shkurtër”, u tha Vangitis reporterëve grekë, duke theksuar se sipas tij Kaçifas u vra nga një distancë e afërt.
Vangelis Vangitis theksoi po ashtu teksa jepte deklaratën se donte të fliste publikisht për t’i dhënë fund sipas tij dezinformimit lidhur me vdekjen e Konstandinos Kaçifas.
“Ai nuk ishte fshehur në shkurre apo prapa shkëmbinjve. Aspak. Ai i përjetoi plagët teksa qëndronte në këmbë. Ai mund t’i shihte qartë vrasësit”, vijoi i afërmi i ekstremistit grek.
Incidenti ka tensionuar më tej marrëdhëniet mes Shqipërisë dhe Greqisë, teksa të dyja qeveritë përkatëse kanë thirrur ambasadorët përkatës për të dhënë shpjegime./ TIRANA TODAY
