Një apel drithërues vjen nga thellësia e shpirtit të një nënë, e cila shpesh nuk ka bukë t’u japë fëmijëve të saj. Rasti i dhimbshëm është prezantuar nga fondacioni “Fundjavë Ndryshe” që ka mbërritur sot në qytetin e Elbasanit. Aty shpjegohet gjendja e mjerueshme dhe historia e një gruaje, e cila po rrit e vetme tre vajza, 3, 5 dhe 6 vjeçe, pas vdekjes së të shoqit. Ky i fundit ndërroi jetë para një viti pas një sëmundjeje të rëndë në mushkëri.
Tashmë gruaja duhet të përballojë gjithçka e vetme. Ajo tregon se shpesh fëmijët i ka zënë gjumi të pangrënë e të uritur. Veç kushteve të rënda ekonomike, zonja tregon se dy nga vajzat e saj kanë probleme shëndetësore, pasi vuajnë nga autizmi.
Ndihma ekonomike prej 27 mijë lekësh nuk i del as për t’u ushqyer. Ndërsa nga gjendja e rënduar ekonomike, ajo është detyruar të mos i çojë në shkollë vajzat e saj.
Fondacioni “Fundjavë Ndryshe” ka vizituar këtë familje dhe ka ndërmarrë nismën për ndërtimin e një shtëpie të re. Teksa publikon videon, faqja e fondacionit apelon për ndihmë si dhe publikon të dhënat për çdokënd që dëshiron të ndihmojë sadopak këtë nënë të vetme.
