Fadil Vokrri i cili ndërroi jetë ditën e sotme, dikur ka shkëlqyer në fanellën e Prishtinës dhe ka qenë idhulli i kosovarëve, më pas me Partizanin arriti majat e futbollit jugosllav. Ndërsa pikën kulmore e arriti tek Fenerbahçe, ekipin turk ku luajti me shumë emra të njohur.
Është ky një nga shembujt e madhështisë së futbollistit nga Podujeva, i cili më pas u bë Kryetar i FFK-së dhe ishte prijës edhe i proceseve të ndërkombëtarizimit të futbollit të Kosovës.
Fadil Vokrri konsiderohet njeriu me meritën më të madhe për hapjen e dyerve drejt anëtarësimit të Kosovës në dy shtëpitë e futbollit, atij evropian dhe botëror – UEFA dhe FIFA.
I lindur në Podujevë, Fadil Vokrri njihej edhe si Diego Maradona shqiptar, për shkak të mënyrës si lëvizte dhe forcës me të cilën gjuante. Idhulli i të gjithë shqiptarëve të Kosovës, Vokrri shkëlqeu me FC Prishtina, duke regjistruar madje disa paraqitje për përfaqësuesen e Jugosllavisë.
Pikën kulmore në fanellën bardhekaltër Vokrri dhe yjet tjerë shqiptarë e arritën kur e mposhtën Yllin e Kuq të Beogradit në shtëpinë e vet, në Marakana.
Karrierën Vokrri e pati nisur tek KF Llapi, për të kaluar në Prishtinë në vitet e 80-ta të shekullit të kaluar – për të cilën skuadër në 172 paraqitje shënoi 55 gola.
Pastaj ai u transferua tek Partizani i Beogradit ku në 55 paraqitje arriti ta tundë plot 15 herë rrjetën kundërshtare. Fadil Vokrri ishte ndër të parët shqiptarë që arriti ta çelte derën për të luajtur në skuadrat e huaja, duke luajtur për Nimes dhe Fenerbahçe.
Ai ishte i preferuari i tifozëve të skuadrës turke, por shkëlqimin që e pati arritur tek Prishtina dhe Partizani nuk mund ta shfaqë asnjëherë në tokën turke. Në shkurt të vitit 2008 ai u zgjodh president i Federatës të Futbollit të Kosovës, me mandat katërvjeçar. Fadil Vokrri konsiderohet njeriu më meritor për hapjen e dyerve drejt anëtarësimit të Kosovës në dy shtëpitë e futbollit, atij europian dhe botëror – UEFA dhe FIFA.
