Personi që shfaqet në një video të regjistruar nga Dritan Haxholli, identifikohet si Agim Celhyka. 42-vjeçari Haxholli u vra nga 37-vjeçari Bledar Toçi, mesnatën e 9 tetorit, në banesën e Marsida Qatjas, në Kavajë.
Pas postimit të kësaj videoje, Prokuroria kërkoi menjëherë arrestimin e Celhykajt nën akuzën për “Moskallëzim krimi”. Pasi nga Prokuroria e Rrethit Kavajë u konsiderua si person që mund të kishte dijeni për konfliktin.
Sipas “BalkanWeb”, Gjykata e Kavajës ka caktuar ndaj tij masën e sigurisë “Detyrim për paraqitje në policinë gjyqësore”, të hënën e parë të çdo muaji.
Po ashtu, në dëshminë e dhënë në Prokurori, Agim Celhyka pranoi se ai ishte personi që shfaqej në video. Por mohoi të ketë pasur probleme me Bledar Toçin, emrin e personit që ai kërcënon me një armë tip kallashnikov në dorë.
“Dritan Haxhollin kam kohë që e njoh. Kam qenë në dijeni të një konflikti ndërmjet tij dhe Bledar Toçit por nuk e di se për çfarë, nuk e di pse ishin konfliktuar.
Nuk e mendoja që konflikti mund të ketë qenë kaq i madh pasi Dritani nuk me kishte thënë se për çfarë bëhet fjalë. Videon e kemi bërë bashkë me Dritanin, për qejf. Me aq sa di unë nuk ia kemi dërguar Bledar Toçit” , mësohet të ketë thënë Agim Çelhyka në Prokurori, shkruan “BalkanWeb”.
Ndërkohë, ne senacën gjyqësore, Çelhyka kërkon falje për fjalët e thëna adresuar Bledar Toçit dhe familjes së tij.
