Dikur truproja i tij, Izet Haxhia ka sot shumë llogari të hapura me Sali Berishën. Haxhai ka lëshuar një sërë akuzash të rënda ndaj ish-kryeministrit, ku më kryesorja është ajo e implikimit në vrasjen e Azem Hajdarit.
Rihapja e dosjes së “vrasjes së shekullit”, pritet të çojë para drejtësisë Berishën, të paktën në cilësinë e dëshmitarit. Lajmi përkoi dje me deklaratën e çuditshme të ish-liderit të PD, se po e mendon tërheqjen nga politika.
LEXO EDHE: Izet Haxhia akuzon Berishën: Pagoi 1 milion euro për të më eliminuar
Një pjesë e dëshmitarëve kyç të asaj ngjarje janë ende gjallë. Dosja “Hajdari”, mund të pasohet nga rihapja e shumë çështjeve të tjera. Por çuarja para drejtësisë e njeriut më të akuzuar në vend në këto 27 vjet, nuk është e thjeshtë.
Gjyqësori është sot një “kantier në ndërtim”. Shumë gjykatës dhe prokurorë, nuk e dinë nëse do të vazhdojnë apo jo detyrën. Juristë dhe avokatë pranë Berishës, i njohin mirë të metat e sistemit, dhe do t’i shfrytëzonin ato maksimalisht për të shtyrë seancat.
Kanë kaluar gati 9 vite nga Masakra e Golemit, dhe gjykata nuk ka arritur ende të dënojë Dritan Dajtin. Drejtësia mund të funksionojë shumë më shpejt në mungesë të presioneve politike, të cilat fatkeqësisht vazhdojnë ende nga të dyja palët.
Nëse vihet realisht me shpatulla pas murit, Berisha do të thyente paktin e heshtur mes palëve, dhe do të nxirrte në skenë dosjet korruptive të Edi Ramës. Kjo do të fuste proceset ndaj tij në Kalendat Greke, dhe Berisha do të dilte nga ato gjyqe si një hero.
TIRANA TODAY
