Prej shtatë ditësh, studentët janë ngritur në protesta ku kërkojnë ulje të tarifave e përmirësim të kushteve për arsimimin e lartë.
Kërkesat prej 8 pikash i janë dërguar Ministrisë së Arsimit dhe Sportit, ndërsa studentët kërkojnë një miratim të tyre nga ministria, por edhe nga qeveria. Krah ankesave të shumta dhe shqetësimeve që studentët kanë shfaqur gjatë këtyre ditëve, ka qenë edhe ryshfeti, një fenomen që studentët madje e kanë denoncuar me emra dhe me shifra.
Ervin Goci, pedagog në Fakultetin e Historisë dhe Filologjisë, në Departamentin e Gazetarisë, tha se nuk ka dijeni për ndonjë rast konkret, por sipas statistikave 90% e studentëve mendojnë se ka korrupsion.
“Nga të gjitha statistikat dhe sondazhet, të paktën nga ky i fundit, janë 90% e studentëve që mendojnë se ka korrupsion. Pra çështja e financave, çështja e atmosferës në universitet, duhet relaksuar”, tha Goci për Tirana Today.
“Pyetje retorike kjo. Sigurisht që ekziston korrupsioni në cdo universitet”, thotë një student.
Një tjetër student në Departamentin e Gjuhëve të Huaja, ankohet për kushtet të cilat i konsideron si skandaloze.
“Jam këtu që nga dita e parë. Do të jem këtu deri ën fund. Jam student tek Gjuhët e Huaja.Ne vërtet i paguajmë ato lekë, por nuk na ofrohet asgjë. Paguajmë më shumë sec marrim në shërbim”, tha një student.
Megjithatë, krahas kërkesave për përmirësim të kushteve dhe uljeve të tarifave, ka studentë që preferojnë të mos komentojnë lidhur me fenomenin e korrupsionit nga pedagogët.
I njëjti student, i pyetur nëse tek Gjuhët e Huaja ka pedagogë që marrin lekë në këmbim të provimit, ai shprehet:
“Nuk preferoj të komentoj. Besoj ju e dini si është gjendja në Shqipëri, kështu që besoj se nuk duhet përgjigja ime, apo jo?”
Një student i Ekonomisë në Universitetin e Tiranës thotë për Tirana Today:
“A ka pedagogë të korruptuar? Ç’është kjo pyetje! Unë jam te fakulteti i Ekonomisë. Nuk është se te fakulteti ynë ka shumë, ka persona ka individë, por kjo është diçka e pranishme në çdo fakultet. Imagjino kur ka këtu në Tiranë, mos pyet farë çfarë mund të ndodhë në universitete si të Vlorës, se kam pasur vëllain ku notën më të lartë ti mund ta marrësh shtatë dhe atë duke paguar një shumë të mirë parash”.
Madje, studentët tregojnë edhe mënyrës se si ndodh fenomeni i korrupsionit me pedagogët, teksa thonë se këta të fundit nuk dalin hapur, por të ngelin disa herë derisa ti detyrohesh ta paguash për të të dhënë provimin.
Një tjetër shqetësim i studentëve është presioni që ushtrojnë pedagogët tek ta, duke u thënë se nëse nuk u blejnë tekstet mësimore, ata nuk do e marrin lëndën./ TIRANA TODAY
