Në një kohë kur Bashkia e Tiranës ka njoftuar nisjen e aksionit për prerjen e lidhjeve të paligjshme të ujit, në rrugën “Lanabregas” në Shkozë, ujë i Selitës rrjedh lirisht nga të çarat shumëfishe të tubacionit.
Kjo situatë vijon prej më shumë se një muaji duke dëmtuar edhe rrugën e asfaltuar.
Situata në fjalë është e paralajmëruar dhe me parë nga banorët, por duket se ka rënë në vesh të shurdhër, pasi UKT nuk ka ndërhyrë për riparimin e defektit.
E ndërsa çmimi i ujit të pijshëm është rritur , nga 45 lek/ m3 në 65 lekë/m3, kusuret me sa duket bien në kurrizin e qytetareve pasi humbjet në rrjet do të paguhen nga këta të fundit.
Tirana Today sjell videot e tubacioneve të çara dhe vërshimin e ujit të pijshmi duke u shpërndarë në rrugë.
Kjo dukuri jo normale duket se nuk ka rënë në sy dhe të kryeministrit Rama i cili e përshkon këtë rrugë pothuajse përditë, pasi është rruga që e çon për në banesën e tij.
E ndonëse taksat janë rritur, qeveria nuk ka marrë masa konkrete përsa i takon investimeve.
Tirana Today kontaktoi ditën e sotme me inxhinierin e UKT-së Durim Mustafai i cili u shpreh se nuk kishin dijeni në lidhje me këtë situatë edhe pse ky shqetësim është pasqyruar më parë në media.
Mustafai premtoi se do te inspektoje zonën dhe do të merren masa sa më parë në lidhje më këtë shqetësim të banorëve.
Durim Mustafai: Mund të më jepni ndonjë numër telefoni të atij banori apo të ndonjë personi që të na tregojë rrugën fiks.
Gazetarja: Rruga “Lanabregs”, në Shkozë, në rrugë kryesore.
Durim Mustafai: Kush e ka përgjegjësinë për këtë? Unë nuk e di se për çfarë behet fjalë dhe ku është kjo humbje uji. Do shkojmë dhe do ta verifikojmë. Çdo njeri duhet të ankohet tek një adresë e caktuar. TIRANA TODAY
