Italia është përfshirë nga stuhi të tmerrshme dhe erëra të forta, që kanë lënë shumë pasoja. Në qytetin e Pescara-s ka rënë një breshër i rëndë, i cili ka lënë të plagosur 18 persona, të cilët janë transportuar menjëherë në urgjencë.
Në videon e publikuar nga mediat italiane, duken reshjet e breshrit i cili shkon deri në madhësinë e një topi tenisi. Shumë njerëz janë plagosur nga këto reshje të pazakonta breshëri, shumë makina janë shkatërruar si dhe janë dëmtuar dritare shtëpish edhe shumë rrugë.
Sipas sinoptikanëve italianë, erërat e forta kanë qarkulluar me shpejtësi mbi 150 km në orë mëngjesin e sotëm në Ravenna, ndërsa ka rënë mbi 80 mlm shi. Stuhia më e fortë u regjistrua në Pescara por edhe zonat si Emilia, Romagna, Marche dhe Abruzzo janë prekur nga këto reshje të dendura shiu dhe breshëri.
